同心防火 守護灣仔

火警雖無預警，但防火知識可以預先裝備！ 灣仔區防火委員會、灣仔民政處及香港消防處合辦「2024-2025年度灣仔區消防安全教育活動」，包括火警演習暨講座、少數族裔防火安全講座及消防局參觀，與灣仔街坊攜手守護社區防火安全。

1. 火警演習暨講座
   去年10-12月期間，我哋先後到灣仔區唔同嘅大廈、屋苑同學校，舉辦多場火警演習暨講座。住戶、學生喺消防員指導下親身參與火警逃生演練，學習如何迅速、安全地撤離現場。演習後，消防員又講解咗唔少家居防火安全知識，以及滅火器同消防喉轆嘅正確使用方法，仲提醒大家要定期檢查同保養大廈消防設備添，參加者都話學到好實用嘅防火知識。
2. 少數族裔防火安全講座
   3/11我哋又去到錫克廟，為區內少數族裔居民舉辦咗一場非華語防火講座。活動當日，消防員以生動示範同簡單易明嘅講解，傳授家居火警逃生技巧及各類滅火器嘅使用方法。參與嘅少數族裔人士都踴躍發問，並積極參與試用滅火器，反應熱烈。佢哋都表示，講座內容充實，大大提升防火安全意識，有信心將來遇到突發火警都可以應對到。
3. 參觀灣仔消防局
   18/12早上，灣仔消防局特別為灣仔區防火委員會及灣仔區議員安排咗一場深度參觀。消防處當日安排咗簡介會，詳細介紹講解灣仔區內各項消防救援服務，並示範各種消防設備同展示不同用途嘅消防車。各個參加嘅委員同議員都表示了解到消防設備喺火警發生時嘅關鍵作用，感受到消防員喺面對火警及緊急事故時嘅專業同應變能力，亦透過呢次寶貴嘅經驗，啟發到未來推動社區防火教育時，可更著重實地演練及消防設備操作教學，幫助灣仔區居民掌握消防安全嘅實用技能。
   灣仔區防火委員會、灣仔民政事務處及香港消防處將繼續推動多元化防火教育，與街坊攜手守護社區安全，一齊同心防火，守護灣仔。