@ 
喺剛剛過去嘅周末(11-12/1) ，黃大仙舉辦咗多項有意義嘅活動 ，一齊重溫吓活動花絮啦 ！
1、親子新興活動體驗日
為迎接第15屆全國運動會及殘特奧運會，黃大仙區學校聯絡委員會、黃大仙區幼稚園校長會、黃大仙區小學校長會、黃大仙區教師會聯合會及黃大仙民政處上周六（11/1）喺摩士公園體育館舉行親子新興活動體驗日 。
黃大仙民政專員 Thomas連同區內一眾校長擔任主禮嘉賓 。活動吸引超過500位家長及同學一同參與，體驗運動樂趣之餘 ，亦可享受共聚天倫嘅時光 。
2、「蝦仔蝦女」關懷長者社區網絡計劃蝦家歡樂慶團年晚宴
Thomas專員、中聯辦九龍工作部處長陳子明及香港社福界心連心大行動副主席譚贛蘭教授喺上周六（11/1）出席由九龍城浸信會社會服務處舉辦上述嘅「蝦仔蝦女」長者慶團年晚宴 ，與一眾老友記及年輕義工聚首一堂 ，共迎新春 。
計劃旨在培訓學生成為「蝦孫蝦塞」 ，並為佢哋配對區內有需要嘅獨居或雙老長者 ，建立跨代的支援網絡 ，讓長者感受到社區關懷 ，同時推廣「互助互信、守望相助」嘅文化 。透過一系列探訪及互動活動，一眾「蝦仔蝦女」已成為老友記嘅「最佳拍檔」，持續支援「蝦爹蝦娘」 ！
3、華服樂章·琼富文化節
為弘揚傳統文化，琼富區居民促進會及黃大仙東分區委員會尋日（12/1）舉辦「華服樂章·琼富文化節」 。黃大仙東分區委員會主席黃國恩博士、副主席陳詩韻校長、瓊富區居民促進會會長張綺明以及一眾黃大仙區議員主持主禮儀式 。
參與者除咗可以著住華服影相之外 ，仲可以參與攤位遊戲及手工藝工作坊 。街坊朋友都對漆扇呢一項非文化遺產十分感興趣 ，仲帶埋親朋好友一同參與製作，唔少作品都別具創意 ！農曆新年將至，大會亦特意安排「親子寫揮春」環節 ，為活動添上濃厚嘅節日氣氛 。
蛇年將至 ，預祝大家新年快樂、事事如意 ，家和萬事興 !
@ 