@ 
東區防火委員會聯同東區民政處及消防處喺1月12日舉辦「東區防火安全巴士巡遊」，呼籲市民一同守護防火安全，提升社區嘅消防安全意識，讓大家感受到社區嘅溫暖同歸屬感！
當日東區防火委員會主席羅達成，聯同東區民政專員陳尚文及消防處港島東分區指揮官符志雄與防火會委員先去咗北角附近排檔派發宣傳單張及紀念品，宣傳防火應急知識！之後大家登上宣傳巴士喺東區街道巡遊，繼續宣傳防火訊息，之後仲組成小隊，分頭探訪東區有需要嘅家庭，了解住戶嘅生活日常同送上新年祝福，而消防員義工就為住戶安裝獨立火警偵測器，加強消防安全，做好家居防火，各位街坊住戶都非常開心讚好！
東區防火委員會同東區民政處及消防處將繼續舉辦多元化嘅防火應急活動，讓社區每一個角落都充滿安全嘅意識！順祝各位居民農曆新年身體健康，事事如意！
@ 