@ 
為迎接嚟緊11月喺香港舉行嘅第十五屆全國運動會，東區民政處聯同東區康樂體育促進會1月12日喺柴灣公園舉行籃球花式入樽賽及全運會港區項目同樂日，畀市民接觸唔同種類嘅體育項目，體驗運動嘅樂趣。
活動當日上午有公開組比賽，一眾選手競爭東區「樽王」之位，過程緊湊激烈。下午又有「嘉賓邀請賽」，由東區區議會、滅罪會、防火會、分區會，以及青年會派出代表，組成10支隊伍參賽，各自施展渾身解數，經過一輪激戰後，最終由東區滅罪會奪得冠軍寶座！
主禮嘉賓包括東區民政專員兼東區區議會主席陳尚文、中聯辦港島工作部副部長尤斌、東區康體會署理主席李豐年、立法會議員梁熙、康文署東區康樂事務經理李蕙明等，不但為得獎隊伍頒發奬項，亦一齊主持全運會倒數啟動禮 。而東區吉祥物「東東」，雖然體型龐大，但都不甘示弱，齊齊做運動，為香港健兒打氣。
除咗激烈嘅比賽，會場亦設有影相打卡位，深受大小朋友歡迎。台上有歌舞表演、劍擊示範，台下有超過10個與全運會港區項目有關嘅攤位遊戲，畀市民投入運動熱潮，—齊為全運會打氣！
@