大埔區防災應急嘉年華順利舉行 街坊市民熱烈支持

「大埔區防災應急嘉年華暨大埔消防局及救護站開放日」18/1喺大埔消防局及大埔救護站舉行，吸引超過7100名市民踴躍參加。活動安排別出心裁，大小朋友除咗明白到消防救護人員嘅工作同奉獻之外，亦學識注意防火同提高應急安全意識，為社區安全出一分力。

嘉年華活動豐富，演練之外又有火警調查犬表演、消防救護車輛同工具展覽、消防處儀仗隊等，小朋友甚至可以試穿消防員同救護員制服，吸引好多大小家庭全員出動。唔少小朋友仲有機會坐埋上電單車救護車消防車打卡，威風十足！除咗舞台表演之外，多個區內團體同小區關愛隊亦精心籌備唔同攤位遊戲，畀大家喺玩樂之餘都可以了解更多防火安全同埋防災應急嘅知識。