@ 
沙田民政處同沙田文化藝術推廣委員會合辦嘅「Sing動沙田歌唱比賽」19/1晚上圓滿舉行 。
比賽已經嚟到第三屆，今年有接近80位參賽者報名參加，當中最年幼嘅只有5歲，最年長嘅係81歲 。入圍嘅10位參賽者經過大會安排嘅專業形象指導、台風及聲樂訓練後 ，喺決賽當晚傾力施展渾身解數 ，全力展示歌藝同舞技 ，配合現場樂隊伴奏，現場不斷響起觀眾嘅掌聲同歡呼聲 ，氣氛熱鬧。
決賽評判團陣容鼎盛，有著名唱作歌手吳國敬及中年好聲音3評審海兒Hedy等。經過評判嚴格及專業嘅評審，青年組同公開組嘅冠、亞、季、全場最佳台風獎及全場總冠軍都已順利誕生 。恭喜各位得獎者! 期望透過比賽將文化藝術喺沙田宣揚開去，亦祝願各參賽者喺歌唱道路上繼續發光發亮。
@