@ 
上星期六（18/1），九龍城民政處、建設健康九龍城協會、九龍城基層醫療委員會、相達生物科技、九龍城地區康健站以及九龍樂善堂喺紅磡社區會堂合辦咗子宮頸癌篩查服務及婦科醫生講座 ，希望提升社區對子宮頸癌嘅警覺性，鼓勵女性進行定期篩查，從而降低癌症嘅發病率 。
活動吸引超過150名婦女參與者。九龍城民政專員蔡敏君、九龍城基層醫療委員會主席彭志宏醫生、相達生物科技董事長及首席執行官招彥燾博士、婦產科專科林立寶醫生、九龍樂善堂主席莫文韜為活動主禮，場面非常熱鬧。有賴各位街坊、醫療專業人士同埋各位義工嘅鼎力支持 ，活動圓滿舉行 。
活動為參加者提供嶄新 同簡單易用嘅子宮頸癌篩查檢測體驗，費用全免。有別於傳統嘅抹片檢測，參加者可以自行採集尿液樣本嚟測試可致癌高風險HPV病毒 。科技嘅進步為大家帶嚟無痛無創，私隱度高，更安心同便利嘅檢測。除咗檢測體驗，參加者都大讚健康講座極具啟發性，令佢哋了解如何預防子宮頸癌，更明白及早發現病症嘅重要性 。
我哋期待未來能夠舉辦更多同類型嘅活動，繼續推動大眾對女性健康嘅關注，與各個地區團體攜手共建更健康嘅社區。
