風調雨順@大埔 – 三門仔新村遷村60周年慶典

三門仔係大埔區一條風光明媚嘅漁村，同香港發展歷史息息相關。適逢今年係三門仔新村遷村60周年，村民悉心籌辦遷村鑽禧慶典，並於1/2舉行典禮。署理大埔民政專員郭鎮齊，立法會議員陳克勤、何俊賢，以及多位大埔區議員都有出席。大會筵開150圍盆菜，幾代同堂嘅村民及一眾嘉賓一邊享用美食，一邊同專程入村參與盛典嘅市民公眾欣賞粵劇表演，不亦樂乎！

喺六十年代初，香港食水短缺，政府決定興建船灣淡水湖以解決供水問題。原本居住於海灣內嘅三門仔居民需搬遷至鹽田仔，亦即係今日嘅三門仔漁民新村。遷村具重大意義，皆因當年36戶漁民配合政府安排搬到現址重建家園，佢哋幾代人嘅付出為本港食水供應作出重要貢獻，實在值得尊敬。