@ 
一連兩日(2月3日至2月4日) 嘅香港遊覽團真係太好玩，第一日灣仔區少年警訊去咗青嶼幹線訪客中心暨觀景台飽覽青馬大橋、汲水門大橋同埋汀九橋雄偉嘅身軀，一路玩一路學習！
之後就去咗天際萬豪酒店食自助午餐，點解大家都好安靜咁食？因為太好味無空閒時間傾計囉！食飽飽之後，灣仔區少年警訊就去咗搭昂坪360睇天壇大佛！沿途經過機場島轉向站、北大嶼郊野公園、彌勒山，風景優美，心曠神怡！最後終於到達天壇大佛，每一次見到呢個全球第一高嘅戶外青銅座佛，都覺得讚嘆不已！行埋昂坪市集，就急急腳咁搭車去到今晚住宿-美荷樓休息啦！
去到第二日，食完個靚靚早餐，就一齊參觀由香港青年旅舍協會設立同管理嘅公屋博物館-美荷樓生活館，介紹一下先啦！美荷樓生活館展覽係描述半世紀前居於徙置區嘅基層市民生活百態，場內總共分為個主題展區，當中包括歷史資料、口述歷史、藏品、相片、影片同埋互動體驗，好似置身喺舊日社區，用唔同角度認識昔日徙置區居民息息相關嘅1950、60年代生活環境！如果大家都有興趣就快啲過嚟參觀啦！
去到節目嘅尾聲，灣仔區少年警訊參加咗黑暗中對話體驗館嘅活動，全程由一個帶領員帶領，利用自己視覺以外嘅感官，包括聽覺、觸覺、嗅覺嚟完成過馬路、搵食物嘅體驗，場景有公園、商店同渡輪等等，模擬失明人士面對嘅處境。當中最震撼嘅係帶領員可以好靈活咁喺黑暗嘅環境入邊走動，佢一定係戴咗夜視鏡啦！
原來體驗館入邊嘅帶領員全部都係視障人士！會員都深深咁上咗一課，大家一定要珍哋而家擁有嘅一切啊！兩日行程好滿足，下次再見啦！
