@ 
適逢新春佳節，為進一步提升灣仔居民嘅防火意識，灣仔區防火委員會、灣仔民政處聯同香港消防處，1月24日舉辦咗「灣仔區防火宣傳巴士巡遊 2024-25」以推廣消防安全意識，同時畀大家感受社區嘅溫暖同新春氣氛！
活動當日先喺灣仔修頓球場舉行啟動禮，灣仔民政處聯同多位嘉賓包括消防處分區指揮官(港島中)林明業、灣仔區防火委員會主席周潔冰、副主席王家揚、活動召集人辛彭芷君、副召集人林國明為活動揭開序幕，一眾灣仔區議員亦有到場支持活動 。其後防火會委員及嘉賓登上防火宣傳巴士正式出發，喺灣仔區各個人流集中地，包括灣仔及天后地鐵站出口、跑馬地電車總站及銅鑼灣行人專用區等地方，向市民派發防火宣傳福袋宣傳防火信息，福袋內包括「逃生三寶」的毛巾及鎖匙扣。希望藉此將防火信息融入市民嘅日常生活，提防火警發生，守護家居安全。
灣仔區防火委員會同灣仔民政處將繼續舉辦更多精彩活動，同大家一齊推廣消防安全，建設更安全嘅社區。在此順祝各位家宅平安、身體健康！
