@ 
喺啱啱過去嘅週末，深水埗區繼續有唔同賀年活動迎春接福。等我深DUCK同大家重温吓！
1.靈蛇獻瑞醒獅招財賀新春 @ 鴨寮街
鴨寮街係深水埗人氣街道，平日已經人頭湧湧，尋日(9/2)就更加熱鬧，因為社區請咗醒獅團隊鑼鼓齊鳴，同商戶及街坊熱熱閙鬧迎蛇年。希望各位東主今年生意興隆，一本萬利!
嚟緊3月1至2號，呢個地標仲會搞搞新意思，舉辦鴨寮街聲影「寮」天室。影音同埋攝影愛好者唔好錯過喇！
深水埗民政專員黃昕然同其他主禮嘉賓包括深水埗區環境衞生總監黃偉能、深水埗中南分區委員會主席黃永威、港九新界販商社團聯合會及鴨寮街販商協會代表等紛紛到場，同街坊齊賀新年。
2.金蛇迎春賀新歲 粵劇表演
同日上午，喺新光戲院大劇場，街坊欣賞咗由粵劇名伶蓋鳴暉同梁心怡領銜演出嘅賀歲粵劇《天賜良緣》。
粵劇係中華文化嘅非遺代表項目之一。呢日嘅劇目仲要係古裝喜劇，大家都 睇到開懷大笑，掌聲不絕，新春氣氛滿滿，深DUCK都拍爛鴨掌啊！
賀歲粵劇由深水埗區文娛康樂促進會主辦，民政總署同深水埗民政處全力贊助，深水埗民政專員亦有出席支持。
深DUCK會繼續陪大家年行大運，願深水埗區事事順遂，居民闔家歡樂安康。
