@ 
呢排天氣寒冷，亦係流感高峰期，深水埗富昌關愛隊舉辦咗唔同活動服務市民，體現睦鄰精神。
關愛隊日前（9/2）分別探訪居住喺富昌邨嘅照顧者媽同用電動輪椅代步嘅兒子，仲有另一名89歲獨居長者。除咗拜年，亦了解佢哋嘅現況，聽吓佢哋嘅新年願望。
兩戶都表示好開心有關愛隊嚟探訪，可以分享佢哋日常面對嘅困難，亦好多謝關愛隊一直幫手解決唔同問題，畀佢哋可以認識到好多街坊老友記，感受社區關愛。
另外，新年期間好多朋友仔都病咗。其實想身體健康好容易，就係預防勝於治療。尋日(10/2)，富昌小區關愛隊喺過渡性房屋雅匯舉行「流感疫苗接種日暨健康資訊講座」，呼籲街坊接種流感疫苗 。希瑪香港中西腫瘤中心首席醫療總監廖少輝醫生向街坊講解關於流感嘅知識，仲提供即場注射流感疫苗或噴鼻式流感疫苗服務，咁就唔驚流感襲擊啦。
深水埗民政專員黃昕然同埋立法會議員兼富昌居民協會主席梁文廣都有參與家訪及健康講座活動。
@ 
@