@ 
火警同疾病一樣，預防勝於治療。10/2，大埔區防火委員會聯同消防處、關愛隊同埋社福機構，為20戶「三無大廈」同劏房嘅居民安裝火警偵測器，同時提醒居民有關家居火警高危伏位，以實際行動減低火警機會。
眾人喺大埔民政專員陳巧敏、大埔區防火委員會主席蔡錦光、副主席何志超同埋大埔區關愛隊大埔墟小區隊長溫官球嘅帶領下，兵分兩路到大埔墟廣福道同四里附近嘅「三無大廈」同劏房戶，安裝火警偵測器同傳遞家居防火安全知識；消防處代表更即時為居民進行家居火警隱患評估同視察，揾出雜物存放隱憂、插蘇負荷過重或短路風險等問題，以實際行動消除家居隱患，防止火警發生。
