@ 
離島民政處16/2喺東涌東海濱長廊首次舉辦咗「18區日夜都繽紛@離島區寵物嘉年華」 ，透過活動宣揚善待動物嘅訊息，並且推廣東涌東海濱長廊呢個寵物友善嘅場所 ，讓更多市民同遊客認識。協辦機構仲包括新界社團聯會離島地區委員會、離島區青年發展及公民教育委員會、離島區青年社區建設委員會、離島區青年發展網絡、新界青年聯會及土木工程拓展署可持續大嶼辦事處。
民政及青年事務局局長麥美娟 連同一眾嘉賓，包括中聯辦新界工作部副部長李功勛、離島民政專員楊蕙心、土木工程拓展署可持續大嶼辦事處處長胡國源、新社聯離島地區委員會主席祝慶台、離島區青年社區建設委員會主席黃頌行、離島區青年發展及公民教育委員會主席陳狄安及新界青年聯會副主席周元谷一齊主持典禮儀式 ，為精彩嘅寵寵躍動巡遊活動揭開序幕 。麥局長仲帶咗佢兩個寶貝 - 麥棗同麥糖一齊嚟玩添！
現場氣氛非常熱烈 ，節目豐富，除咗有音樂舞蹈貫穿全場嘅寵寵躍動巡遊 ，仲有讓愛寵成為一日明星嘅寵寵星光大道 、人寵合力挑戰難關嘅寵寵樂園 、提供各式各樣寵物小食及用品嘅寵物市集 ，同埋考驗寵物嘅速度同靈活性嘅寵物障礙挑戰賽 。另外，嘉年華仲有消防處火警調查犬訓練示範 、現場寵物領養 、寵物主題打卡位 、工作坊、講座、有獎攤位遊戲 等，吸引咗唔少市民專程帶埋寵物到東涌參與。無論係大人小朋友定係寵物今日都盡興而歸，一齊度過咗一個非常愉快嘅周末 。
