@ 
東區民政處自2014年起推出青年網絡「東區青藤」計劃，目標係拓展學員嘅個人潛能，培育佢哋成為關心香港、關愛社會嘅未來領袖人材！
第10屆青藤計劃嘅其中一個重點項目係由學員分成小組，自行策劃及完成一項社會服務活動，培養學員建立團隊協作能力，溝通技巧同領導才能，認識同感受社會上不同社群嘅需要，提升公民責任感。四組學員嘅服務主題都唔同，除咗有為唔同嘅服務對象，包括託管兒童、殘疾人士、中度智障人士設計活動，亦有向社區宣揚愛護動物信息嘅主題活動，各具特色。
紅組籌劃戲劇工作坊，同託管兒童一齊進行戲劇訓練同埋作劇本；綠組就為殘疾人士準備咗製作食物同樂日同手工藝體驗，手把手一齊製作木糠布甸同許願瓶；藍組就為中度智障院友帶嚟聖誕同新春同樂日，歡渡佳節；黃組除咗到流浪狗場學習點樣照顧犬隻外，亦分別喺各自學校嘅早會向全校師生宣揚愛護動物信息，仲喺柴灣社區嘉年華設置攤位，透過遊戲向街坊宣傳保護動物嘅意識。
學員喺籌備同推展社會服務嘅過程中，克服重重挑戰同困難，大家都認為呢個係難能可貴嘅學習體驗，認真實踐「助人自助、磨練自己、回饋社會」嘅青藤座右銘！
時間過得好快，眨眼第10屆青藤學員快將畢業，請大家繼續關注佢哋嚟緊3月初嘅畢業典禮同成果分享匯報嘅消息！
