@ 
3月1日灣仔警區少年警訊足球代表隊同元朗警區代表喺銅鑼灣紀律部隊人員體育及康樂會進行咗精彩絕倫嘅總決賽！
經歷咗多場激烈嘅球賽，可以晉升到決賽嘅兩隊隊員都擁有頂尖嘅球技同埋心理質素，球技觀賞性都非常之高！今日仲有灣仔警區指揮官 廖珈奇總警司、灣仔區少年警訊名譽會長會主席 梁智佳先生及一眾會長，同埋香港華仁書院校長 陳偉倫博士一齊打氣！
上半場，兩隊球員互不相讓，但元朗區成功把握灣仔區後防嘅一個失誤，搶先領先一球！不過灣仔區冇就咁氣餒，越戰越勇，喺完半場前力追成1:1！
大家經過短暫休息之後，下半場戰況依然激烈，不過灣仔區嘅前鋒真係勢不可擋，撕開元朗區嘅後防反超2:1！雖然灣仔區並冇因為領先而驕傲，但係元朗區嘅實力真係唔可以忽視，喺接近完場嘅時候，元朗區嘅前鋒亦都頂住壓力，喺球證吹起哨子之前，搵到機會勁射龍門，完場賽果2:2，追加十二碼，比賽真係好戲劇化！
最後，灣仔區以3:1（十二碼）擊敗咗元朗區，勇奪少年警訊區際足球比賽2025嘅冠軍，區淳朗同學仲獲得最佳守門員獎！辛苦晒各位球員！
