@ 
中西區民政處與中西區青年發展及公民教育委員會合辦嘅「中西區青年日」上星期日（2/3）喺堅尼地城卑路乍灣海濱長廊成功舉行！今次活動唔單止係一場青年人嘅盛會，更係一次創意與活力嘅大爆發！
「中西區青年日」嘅活動豐富又精彩，有超過60名青年人為市民帶嚟多項高質素又高水準嘅表演，包括動感十足嘅樂隊演奏、魔幻驚喜嘅魔術表演、活力四射嘅舞蹈、技巧高超嘅花式跳繩，仲有熱血沸騰嘅空手道示範！每項表演都令觀眾睇到目不轉睛，掌聲同歡呼聲此起彼伏，現場氣氛澎湃！
近100名青年人發揮無限創意，策劃同營運多個主題攤位，環繞非物質文化遺產、宣揚禮貌同推廣第十五屆全國運動會比賽項目，設計咗一系列好玩又富教育意義嘅遊戲、手工製作同運動體驗。每個攤位都充滿心思，吸引咗唔少大人細路一齊參與，笑聲同歡樂充滿整個場地！
中西區民政專員鄭建瑩、港區全國政協委員葉永成、中西區青年發展及公民教育委員會主席林振風、區議員同兩個中西區青年委員會委員都喺現場，同參與嘅青年人打氣加油！佢哋嘅支持同鼓勵，令現場嘅氣氛更加熾熱 ！
活動仲舉行咗多個頒獎環節，包括「Get on Air 2024」手機短片製作體驗計劃、「中西區青年獎勵計劃」同「國慶攝影比賽@中西區」。現場更展出區內中學生喺上年舉行嘅寧夏交流團中完成嘅刺繡作品，包括代表香港道地飲食文化之一嘅點心、經典電車等，全部都活靈活現。呢啲項目唔單止展示同肯定咗青年人付出嘅努力和心機，更為中西區青年發展及公民教育委員會今年嘅活動作出完美總結！
