@ 
土木工程拓展署喺3月10日正式同港鐵公司簽訂杏花邨沿岸改善工程協議。協議喺東區民政專員兼區議會主席陳尚文、發展局及土木工程拓展署代表、東區區議員同埋杏花邨業主委員會主席嘅見證下，由土木工程拓展署與港鐵公司簽署落實。根據協議書，政府將協助杏花邨加建弧形擋浪牆同埋更多可拆卸式擋水設施。
協議嘅簽訂實在係有賴唔同嘅政府部門同地區攜手推動。政府公布嘅「氣候變化和極端天氣下的沿岸災害研究及改善措施的制訂 – 可行性研究」，為杏花邨在內26個較高風險嘅沿岸低窪或當風住宅地區制訂改善工程同埋管理措施，東區民政事務處喺24年3月9日聯同發展局同埋土木工程拓展署出席居民諮詢會，向居民講解沿岸改善工程嘅細節。方案最終亦都成功喺24年7月6日舉行嘅杏花邨沿岸改善措施業主大會獲得通過，贊成比率高達92.72%。
為咗更加有效應對極端天氣，東區民政專員兼區議會主席陳尚文早喺24年1月首次東區區議會會議中，已經將強化東區應對極端天氣能力及安排列作東區區議會研究及關注嘅地區議題。除咗落實杏花邨沿岸改善工程，東區民政處過去一年亦都做咗好多嘅工作，致力強化東區應對極端天氣能力。
為咗配合行政長官提出嘅四大策略之一：超前準備，安排跨部門防風演習，喺24年6月26日統籌各政府部門 (路政署、食環署、康文署、渠務署)、杏花邨管理處及杏花邨業主委員會舉行防風跨單位演習，令到各單位能夠更加熟習颱風時嘅預防措施。亦都好關注水浸源頭做成渠道堵塞嘅問題，所以一直密切留意區內嘅工地，提醒相關部門喺惡劣天氣來臨前覆蓋好挖掘物料，從源頭減少區內水浸嘅風險，去年9月颱風摩羯襲港前，聯同區議員巡視咗明華大廈工地，確保挖掘物料已妥善覆蓋。
另外，為咗配合行政長官提出嘅策略：果斷應急、迅速復原，我地喺去年9月颱風摩羯襲港時首次啟動咗東區區議會應對極端天氣通報群組，議員可以利用群組向我地匯報各小區喺颱風吹襲期間同埋颱風吹襲過後嘅情況，以便我地將個案轉介比相關政府部門盡快跟進。最後，路政署亦都已經完成咗耀興道餘下嘅山坡緊急修復工程，耀興道唔需要再喺特定嘅惡劣天氣警告信號生效期間實施特別嘅臨時交通安排。
未來東區民政處會持續強化東區整體應對極端天氣嘅能力，將極端天氣帶嚟嘅破壞同埋影響減至最低，讓市民生活盡早、盡快回復正常。
