「東區青藤」計劃2024-2025畢業典禮暨成果匯報喺3月8日順利舉行,25位第10屆「東區青藤」計劃學員精神抖擻著起畢業袍迎接呢個重要時刻!
畢業典禮由香港樂隊「遇飛塵」嘅表演揭開序幕,跟住由6位學員組成嘅「E-idol」帶嚟精彩嘅歌舞表演,將現場氣氛推上最高點!
經過接近1年嘅訓練,青藤學員都有好大進步,佢哋分享咗超過19個大大小小活動內容同難忘經歷,又匯報咗喺不同職場體驗嘅所見所聞。透過職場實習體驗,讓佢哋更清楚自己嘅職涯規劃,對未來路向更清晰。
學員對青藤計劃嘅核心項目 — 社會服務活動最為深刻,佢哋分享咗同組員間由自行籌劃到執行活動箇中嘅種種困難同得着,由討論服務活動內容到策劃過程,大家學習聆聽包容,建立團隊精神,從中深入了解社會上不同受助對象嘅需要,設計返貼心合適嘅社會服務畀服務對象,實踐「回饋社會」嘅青藤格言。
畢業禮嘅高潮當然係學員著上畢業袍,逐一從東區青年事務顧問委員會顧問手上接過畢業證書。東區民政專員兼東區區議會主席陳尚文就頒發優異學員獎畀6位表現出色嘅學員。畢業後嘅第10屆東區青藤計劃學員將晉身成為「青藤」畢業生網絡「藤絡」嘅一員,繼續履行「助人自助、磨練自己、回饋社會」嘅格言!
嚟緊4月12日,係「東區青藤」計劃十周年成果匯報暨分享會,民政處祝願「東區青藤」計劃繼往開來,共同譜寫更多個10年。