@ 
中西區民政處過往舉辦咗幾屆兒童板球訓練賽，都一直深受歡迎，讓更多區內同學有機會接觸同認識依項運動！本年度，中西區民政處再次聯同中西區新來港定居人士服務地區統籌委員會合辦「兒童板球訓練暨板球邀請賽2024-25」，透過運動連繫區內非華裔及本地學童，以體育會友，提供平台畀佢哋互相交流，促進社區共融。
板球係一項可以鍛鍊手眼協調同四肢動作控制能力嘅運動，更可以提升參加者團體合作嘅精神。同學們啱啱完成4個月嘅培訓課程後，3月8日就同兩隊區外隊伍進行友誼賽，互相切磋球技。參賽嘅同學喺場上都施展渾身解數，力求為所屬隊伍爭取積分，賽情非常激烈，觀眾都睇得十分投入及緊張！
中西區新來港定居人士服務地區統籌委員會副主席陳光明同工作小組主席王嘉駿亦有到場為同學打氣及頒發獎項。賽後，無論輸贏，同學們面上都係滿足嘅笑容，充分展現出「友誼第一、比賽第二」嘅精神。比賽之餘，有機會強身健體，學習堅毅不屈嘅體育精神，又認識到唔同文化背景嘅朋友，仲贏得咗珍貴嘅友誼，呢啲都係同學們之間最大嘅收穫。
