@ 
唔知大家有冇睇過早前上映嘅一部電影，以傳統殯葬行業為主題，即時引發全城對殯葬嘅好奇。3月8日中西區民政處舉行咗兩場別具意義嘅「舊贊育產科醫院 x 東華義莊 – 生死教育導賞團」，為大家揭開箇中神秘嘅面紗。
導賞團嚟到「舊贊育產科醫院」（現為「西區社區中心」）。喺導賞員詳細同有趣嘅講解下，團友一邊欣賞呢座見證咗無數生命誕生嘅一級歷史建築，一邊了解香港婦產科發展嘅歷史。之後，導賞團仲去埋附近嘅「第二街公共浴室」，了解呢座二級歷史建築喺當時對抗鼠疫時作出嘅關鍵作用。
導賞團亦去咗「舊精神病院立面」（現為「西營盤社區綜合大樓」）及「前華人精神病院」（現為「東邊街美沙酮診所」），了解到呢幾座法定古蹟同歷史建築嘅「前世今生」，亦希望大家關注身體同精神健康。
導賞團嘅重點項目嚟到「東華義莊」。1875年，東華義莊由上環文武廟出資興建，座落西環牛房附近，其後轉交東華醫院管理，遷建到大口環現址，為有需要嘅市民提供先人靈柩、骨殖及骨灰嘅永久及暫時寄厝服務。中西區民政處特別感謝東華三院嘅協助，安排同工帶領大家參觀東華義莊，分享香港殮葬服務嘅演變，以及當中傳承落嚟嘅中華文化及人文精神。
其實兩場導賞團一推出就火速爆滿，仲吸引咗中西區民政專員同埋約20名中西區青年社區建設委員會同青年發展及公民教育委員會委員一齊參加。團友們均表示，透過探索呢啲陪伴市民走過人生不同階段嘅設施，以獨特同生動嘅角度介紹中西區嘅歷史文化，除咗引起團友對生命有更深刻嘅反思，亦釋除咗大家對死亡同殯葬事宜唔少嘅誤解同恐懼，實在獲益良多，亦度過咗一個好有意義嘅周末！
