@ 
中西區民政處喺3月8日舉辦咗「口腔衞生講座」同埋「劍擊運動體驗日」，向市民推廣健康生活，鼓勵大家保持強健體魄之餘，仲要注重口腔健康，好好享受人生、品嘗美食！
1. 口腔衞生講座@中西區
講座由中西區民政處聯同中西區區議會、中西區青年網絡、中西區青年發展及公民教育委員會，同埋中西區青年社區建設委員會舉辦，仲邀請到中西區區議員陳建強醫生擔任主講嘉賓。
陳醫生詳細講解各種同牙齒健康息息相關嘅資訊，包括牙痛原因同處理方法、牙齒美容同箍牙注意事項等。陳醫生更提醒大家，好多研究指出牙齒問題例如牙周病，同心臟病、糖尿病等疾病相互關聯，所以大家千祈唔好忽略口腔健康嘅重要性 ！
參加者仲獲贈精美牙齒護理套裝，咁大家就可以坐言起行用行動守護口腔健康！大家記住要保持口腔衞生，自然可以隨時綻放燦爛笑容，同身邊人分享快樂啦！
2. 精英運動員慈善基金賽馬會動感社區計劃——運動體驗日@中西區
中西區民政處聯同精英運動員慈善基金合辦嘅「精英運動員慈善基金賽馬會動感社區計劃——運動體驗日@中西區」，讓市民體驗香港將於第15屆全國運動會承辦嘅其中一項競賽項目——劍擊，吸引咗一班大小朋友參加！
教練先向參加者講解重劍、花劍同佩劍嘅不同之處同比賽得分嘅方法，俾大家掌握劍擊比賽嘅基本知識後，再學習劍擊嘅姿勢！之後，參加者都急不及待着上劍擊運動專用既護甲、頭盔同埋其他裝備，同其他參加者切磋劍法，感受身穿「戰衣」，成為「劍王」、「劍后」嘅感覺！
