@ 
中西區民政處及中西區青年網絡喺3月9日就同一班年青人跳出中西區，出發到香港碩果僅存嘅產鹽地－鹽田梓（又名鹽田仔），展開一趟生態文化之旅，一齊探索同發掘香港唔少珍貴嘅大自然美景。
嚟到鹽田梓，最重要當然係體驗海鹽製作啦！參加者首先認識蓄水池、蒸發池、結晶池等基本設施，再學習以「波美度計」測試海水中鹽嘅濃度，並嘗試將海鹽推成鹽堆，最後親手將鹽入樽，變成屬於自己嘅紀念品！
除咗鹽田之外，呢度仲孕育咗豐富嘅生態系統同傳統客家文化。喺導賞員講解之下，大家認識到紅樹林嘅生物多樣性，除咗可以搵到秋茄樹、錫葉藤等植物之餘，亦會見到焦潮蟹、彈塗魚等生物。此外，島上亦有唔少以複式單元為主嘅客家村屋，一班青年人可以從中了解到客家建築特色。
喺呢個天朗氣清嘅一日，青年朋友們一齊親親大自然，既學到造鹽當中嘅種種學問，仲可以親眼睇到喺課本出現嘅植物同生物，實在係周日一大樂事！
