@ 
一直致力推動社區關愛精神嘅灣仔民政處代表早前聯同律敦治及鄧肇堅醫院行政總監劉家獻醫生、社會福利署東區及灣仔區福利專員蕭建香、區內社福機構代表及一眾義工朋友一同探訪律敦治醫院嘅院友，希望佢哋感受到社區嘅溫暖同支持！
團隊探訪咗外科、內科及老人科同埋矯形及創傷外科嘅院友，為佢哋送上實用嘅日常用品，包括水杯、濕紙巾同毛巾等嘅心意福袋。物輕情意重，院友收到呢份滿載祝福嘅禮物都覺得好感動，仲用真摯嘅笑容回應團隊嘅誠意。在場義工都紛紛表示，院友嘅笑容正正就係佢哋堅持每年嚟幫手嘅動力！探訪團隊衷心祝願院友們早日痊癒，身心安康！
灣仔民政處會繼續同社區攜手將呢份關懷傳遞開去，令更多人感受到關懷同鼓勵，共同用愛連繫社區。
