@ 
春回大地，大家有無嚟東岸板道打卡同欣賞維港景色呀？
3月15日喺東岸板道舉行咗「第一屆舞動東區街舞比賽 」，係繼東岸板道開幕禮後第一次舉辦嘅盛大活動，並由東區民政處同香港東區各界協會攜手合辦。東區民政專員兼區議會主席陳尚文、中聯辦港島工作部副部長尤斌、香港東區各界協會會長温俊文、東區警區指揮官陳天柱、以及東區吉祥物「東東」等齊齊撑場，為舞者打氣。
當日超過100名街舞愛好者雲集東岸板道。由中午海選，鬥到晚上決賽。雖然期間遇上狂風暴雨而暫停比賽，但無阻參加者嘅鬥志，復賽後越跳越勁，無論Hip Hop 1v1，定係All Style 2v2，每個動作都超高水準，震撼維港舞台。現場充滿熱烈嘅掌聲、尖叫聲，全場氣氛High爆。經過連場激戰，第一屆舞林王者終於誕生！
時間飛逝，「2024-25東區文化節」嘅活動已經完滿結束。民政處舉辦咗8項精彩活動，包括粵劇文化體驗、海上音樂會、戶外電影欣賞會同舞蹈藝術等等。東區民政處衷心感謝各個合作伙伴嘅鼎力支持，同埋大家嘅踴躍參與。
而家即刻去片，回顧當日舞林高手嘅精彩表演！
