@ 
食環署署長吳文傑日前(19/3)邀請咗深水埗民政專員黃昕然同一眾深水埗區議員參觀區內一個屋苑同埋食環署南昌辦事處暨車房，了解吓《滅鼠約章》 嘅推行情況，以及食環署車隊同車房嘅日常運作，互相交流吓。
參觀期間，食環署同物管公司簡介咗《滅鼠約章》，例如喺屋苑落實嘅滅鼠措施，就包括有喺垃圾房 同草叢等地方擺放滅鼠盒等，議員都有了解到屋苑推行《滅鼠約章》嘅情況。署長、專員同一眾區議員亦有就滅鼠問題分享經驗同意見。
喺食環署南昌辦事處暨車房參觀期間，食環署人員就分享咗車隊嘅角色同車房嘅日常運作，並重點講解小型洗街車隊嘅工作，隨後更示範高速清洗盤同垃圾車嘅操作，等議員能夠更深入了解清洗街道嘅工作。
深水埗民政專員黃昕然感謝食環署過去為提升區內環境衞生而推行嘅各項工作，包括滅鼠、公廁美化、排檔管理同處理阻街問題等，多項關注議題均有顯著改善，期望日後繼續加強署方、議員同民政處之間嘅三方合作，攜手為社區、居民建設更美好嘅生活環境。
@ 