@ 
由九龍城民政處、九龍城區議會同九龍城區居民聯會聯合主辦嘅「18區日夜都繽紛·龍城美食潑水泰繽紛 」啟動禮今日（21/3）喺九龍城廣場中庭順利舉行！
啟動禮由本區青年帶嚟嘅精彩表演拉開序幕！先有泰國舞蹈表演，為現場觀眾帶嚟濃厚嘅泰國文化氛圍；再有林文燦小學醒獅隊帶嚟充滿活力嘅醒獅表演，為活動增添喜慶氣氛。九龍城民政專員蔣志豪、泰國駐港總領事Mr. Chaturont CHAIYAKAM、立法會議員楊永杰等一眾嘉賓為活動主禮。
今年民政處會喺4月11至13日，一連3日喺九龍城賈炳達道公園舉辦泰繽紛活動，畀大家親身感受泰國潑水節嘅熱鬧氣氛。除咗繼續有萬眾期待嘅電音x潑水體驗之外，仲有泰國特色市集、各種泰國美食等等。當然唔可以錯過緊張刺激嘅泰拳邀請賽同埋精彩絕倫嘅泰國歌舞表演啦。
為進一步提振九龍城區嘅經濟，今年仲特別推出「消費大抽獎」 活動！市民同遊客只要喺4月1日至5月6日喺九龍城區內嘅商戶消費滿港幣200元，即可獲得一次抽獎機會 ，禮品總值超過港幣50萬！指定商戶更會提供專屬優惠同折扣，市民可留意商鋪嘅「特約商戶」標誌，享受更多優惠。
記得約埋屋企人同朋友一齊嚟九龍城盡情玩、盡情食、盡情買！約定大家九龍城見，一齊日夜泰繽紛！
@ 