@ 
民政總署喺2023年於全港18區分別成立咗兩個地區青年委員會，為青年人提供平台，就社區建設、青年發展同公民教育等地區議題發表意見。屯門區兩個青年委員會自上任以嚟，一直同屯門民政處同心協力，支持政府嘅地區青年工作，圓滿完成2023-25年嘅任期！
屯門區青年社區建設委員會嘅委員積極就各項地區設施工程進行討論同提供意見，例如天后廟廣場改善工程、洪祥路垃圾收集站優化工程，同埋房屋局「共築• 幸福」項目等。值得一提嘅仲有龍鼓灘籃球場美化工程，委員除咗就設計提供意見之外，仲聯同小學生一齊親身進行美化工程。大家睇到完成後嘅設計都非常興奮同埋有滿滿成就感！
另一項主要工作就係為屯門區設立打卡地標，展現地區獨特風貌。委員透過實地視察，加埋就設施位置同設計風格等提出意見，落實咗3項永久設置嘅打卡地標項目，包括屯門徑彩虹欄杆、大欖涌水塘千島湖嘅特色指示牌，仲有喺彩虹欄杆設青山山脊線剪影同埋喺三聖青山灣海濱長廊設海鮮桌裝置，為原有特色地標增添唔少色彩！
至於屯門區青年發展及公民教育委員會喺任內就為年輕人籌辦咗超過45項活動，當中包括屯門區年度品牌項目「成功有約」屯門區青年自我挑戰及獎勵計劃，兩年內培育出接近200位學員；另外亦舉辦咗多個國內外交流學習團，包括上海及杭州、天津、深圳、同埋北歐等，令一眾學員大開眼界，喺增強國家同民族認同感嘅同時，亦擴闊國際視野同埋認識國家喺世界舞台上嘅發展。
屯門區青年發展及公民教育委員會亦都有推出多項新項目，包括喺舊年開始首辦嘅「屯門區青年高峰會」，等年輕人同政府部門代表面對面交流同討論各項地區議題，深化地區公共服務嘅推行，提高年輕人嘅參與；亦喺今年首辦「屯門區公民教育青年領袖培訓計劃」，為屯門區中學生提供一系列嘅培訓課堂，第一課就係由民青局局長講解完善地區治理方案，進而同政府部門代表實地視察，到最後喺「模擬區議會」發揮所學，加深學員對社區嘅認識，同時提高公民意識。
兩個青年委員會更係合作無間，包括喺「18區日夜都繽紛@夜屯園」同「屯門冬日舞動音樂遊藝會」肩負起工作坊同攤位嘅工作。一班年輕人展現出服務社區嘅熱誠，成功協助大會吸引大批市民到場參加活動！
兩個青年委員會喺新一屆會繼續聯同屯門民政處積極推行各項工作，秉持服務年輕人嘅決心，全力培育屯門區嘅青年成為有擔當、有理想嘅新一代！
