@ 
大埔民政專員陳巧敏，連同大埔鄉事委員會主席暨大青活動策劃委員會副主席林奕權、青年領袖工作小組召集人梁中明、雲南省政協港澳委員聯誼會會長陳冬海同雲港澳台青年交流促進會榮譽主席林粵春，率領30位大埔青網成員，喺7月9至13日親身體驗雲南歷史悠久及多元嘅少數民族文化！
今次雲南省（簡稱滇）交流團5日期間進行咗3個體驗式工作坊、到訪2座中國歷史文化名城（大理及麗江古城）、探訪1間長者中心，同埋上咗1座海拔3200米嘅雪山，大青成員今次真係行萬里路！
大埔青網沉浸式體驗安排親手製作國家級非物質文化遺產白族紮染、學習並製作手繪納西族獨有嘅圖案文字，更到訪茶園以新鮮白茶茶葉即場製作茶餅，絕對係獨一無二嘅文化體驗！
今次交流團亦貫徹大埔青網服務社區嘅精神，探訪咗當地養老服務中心，與中心嘅老人家玩遊戲！同時，亦參觀咗雲南民族大學、到訪傳統白族民居、體驗楚雄彝族特色長街宴同篝火晚會，深入認識雲南少數民族嘅文化、歷史、習俗同風情。
今次交流團更史無前例，組成大埔青網聯隊與全國排名第五嘅大理州民族中學籃球代表隊，一齊透過切磋球技，加深滇港青嘅認識同促進彼此友誼！今次球賽盛況空前，喺在場近500名學生熱情嘅打氣同歡呼聲下，大青僅以40：44力逼滇青，大家享受比賽之餘、做到「友誼第一」嘅目標。
參與交流團嘅大青成員必須出席有關雲南多元少數民族嘅工作坊及提交作文，並經過面試評審過五關斬六將先可以入選本團。
民政署話今次嘅交流團得以順利舉行，實在有賴雲南省政協港澳委員聯誼會及雲港澳台青年交流促進會嘅鼎力支持同悉心安排。
@