@ 
喺沙頭角紅花嶺郊野公園入面嘅蓮麻坑礦洞，近期成為本地旅遊熱點。身兼打鼓嶺鄉事委員會主席嘅立法會議員陳月明24/3就約埋漁農自然護理署署長黎堅明、立法會議員姚柏良、北區區議員溫和輝同高維基，仲有北區民政專員賴子堅，一齊去咗紅花嶺郊野公園同蓮麻坑礦洞走一轉，親身感受一下呢個最新景點嘅吸引之處。
一行人喺擁有300年歷史嘅蓮麻坑村出發，途經喺50年代興建嘅二級歷史建築 — 麥景陶碉堡（礦山），再行上山多一陣，就到咗蓮麻坑礦洞喇！礦洞喺19世紀已經有開採紀錄，曾經係香港最大嘅鉛礦場，喺50年代停產後，慢慢成為10種蝙蝠嘅棲息地，佔咗香港蝙蝠物種嘅4成，具有好特殊嘅生態價值。其實紅花嶺郊野公園仲有豐富嘅動植物多樣性，包括罕見嘅鳥類大草鶯，係大自然愛好者郊遊嘅理想選擇！
