@ 
科技發展日新月異，青年應該如何裝備自己，投身創科行列？葵青民政專員鄧顯權喺1月下旬帶領區內6間中學嘅24位學生，參觀位於香港科學園嘅「納米及先進材料研發院(NAMI)」，畀學生深入了解創新科技產業嘅發展趨勢，並親身體驗科研工作日常 。
活動獲多位嘉賓支持，包括荃灣葵涌及青衣區中學校長會副主席簡偉鴻、執委鄧錦明及許建業，仲有香港工商總會青年網絡副主席兼葵青區議會增選委員余靖浵，一同出席活動兼同學生交流 。
STEM Kit 體驗工作坊
由NAMI專業團隊帶領，同學們親自組裝同測試「壓力感測器」裝置，認識電子原理，同時培養實踐能力 。導師熱情指導，現場氣氛熱烈，同學投入又開心 。完成後仲可以將STEM套件帶返屋企，同屋企人一齊玩中學、學中做 ！
參觀科研實驗室
同學們參觀保健及電子實驗室，學習原材料合成同應用技術，了解科研點樣連繫日常生活 ，同時亦學到實驗室安全守則，明白「大膽假設，小心求證」唔止係口號，更係科研人必須堅守嘅態度 。
活動畀學生近距離接觸科研實務，拓寬視野，激發對創科行業嘅興趣 。期望佢哋未來能夠善用今次所學，為香港發展成為國際創新科技中心貢獻力量 。活動由葵青民政處、葵青區青年發展及公民教育委員會、香港工商總會青年網絡合辦，仲得到荃灣葵涌及青衣區中學校長會支持。特別鳴謝NAMI及董事兼油尖旺區議員歐楚筠大力協助，促成呢次具啟發性嘅參觀活動 ，令同學們滿載而歸，留下難忘嘅學習體驗 。
