@ 
小朋友天性愛玩，家長就想小朋友玩得開心又放心 。由中西區民政處主辦嘅「兒童加油站」，就可以一次過滿足晒大家嘅願望！
「兒童加油站」旨在喺區內體育館兒童遊戲室現有設施嘅基礎上，加入各種家中常見嘅物品，打造一個更有趣嘅室內空間 。配合唔同季度主題，小朋友可以探索各種場景，化身不同角色，發揮創意同想像力，拎起各式各樣物品同家長自由玩樂 。例如簡單利用彩帶同絲花，就已經可以置身「絲帶雨林」同埋花瓣綻放嘅空間；將浮水條同紙箱剪剪畫畫 ，小朋友又可以化身成為鯊魚同海龜，漫遊「海洋世界」 。
活動自去年7月開始至今已經吸引超過7400名大、小朋友嚟大玩特玩！最新一期兒童加油站以「小小運動員」為主題，逢星期五同六喺士美非路體育館兒童遊戲室，為各位帶嚟「小射手大挑戰」、「小運動員頒獎禮」等好玩活動！3月31日就會開放4月份時段報名，各位家長記得mark低日子，齊齊為小朋友成長加FUN！
