@ 
大埔區青年社區建設委員會28/3召開本屆最後一次會議。過去兩年，委員會匯聚區內青年力量，成功推進多項計劃並就不同社區設施項目提供建議，全面提升大埔區嘅活力及藝術氣息：
1、大埔社區中心多用途籃球場翻新工程
適逢大埔社區中心籃球練習場有計劃進行翻新工程，大埔民政處邀請委員會就設計概念提供意見。經過委員嘅細心討論以及建築署嘅配合，練習場已經於3月搖身一變成為實用之餘亦富藝術感嘅場地。除咗粉彩色系加上大埔標誌嘅球場地面、動感球員剪影圍欄，仲增設咗三人籃球比賽嘅場地劃線。因應平時亦有街坊定期喺練習場上耍太極，委員仲別出心栽咁加入太極八式展示版。設施正式開放後相信會廣受市民歡迎！
2、大埔運動場室內抱石場
為推廣城市運動，康文署計劃將大埔運動場其中一個壁球場改建成室內抱石場，讓市民可以體驗運動攀登。委員會由2023年5月開始討論，就住設計及運作安排等方面提供意見。改建工程已經喺今年2月開展，預計第四季就會竣工。
3、連接大埔墟火車站行人隧道美化工程
為響應2023年「青年節@HK」，路政署、民青局及民政總署合辦「公共道路設施美化計劃」，喺全港各區預留指定嘅路政署設施，讓區內青年人發揮創意進行美化。
委員會除咗透過會議討論外，亦與民政處一同舉辦工作坊讓更多年青人參與。壁畫最後以「今昔大埔」作為主題，分別以老照片重現舊時大埔及以手繪圖片呈現今日發展，讓大家彷如置身時空隧道。
隧道壁畫於2024年11月完成後深受街坊歡迎，為平凡嘅隧道帶來煥然一新嘅感覺，而遊客經過隧道時都可以透過壁畫認識到大埔嘅特色地標同建築物。
4、真。龍舟「打卡」地標@大埔
2023年《施政報告》提及於18區設置富有地區特色嘅「打卡」地標，委員會經多番討論後決定喺大埔海濱公園香港回歸紀念塔旁放置經翻新嘅傳統木製龍舟供大家「打卡」。
龍舟地標緊扣已經有超過80年歷史嘅大埔區年度盛事 - 大埔龍舟競賽，並於2024年3月完成，吸引好多區內外市民前往打卡。
除以上項目外，委員會亦就改善林村河兩岸設施等不同地區項目提供寶貴意見。再次感謝2023-25年度一眾大埔區青年社區建設委員嘅參與！
相信新一屆委員會將繼續以創意及熱情為社區注入更多活力。期待有更多提升市民幸福感嘅設施同項目可以再同大家分享！
