@ 
1. 長者友善樓宇設計
深水埗區有唔少舊樓宇，當中好多都無電梯。深水埗民政處成日都諗點樣可以喺社區加入更多長者友善設施。等深DUCK 同大家一齊睇吓一啲地區先導計劃。
呢個「長者友善樓宇設計」試驗計劃最近同區內慶成樓業主法團合作，完成改善項目！
計劃以「安全、清晰又便利」為核心，以加裝扶手、防滑設施、智能科技同通用設計，全方位提升長者生活質素。
三大升級設施
1. 防滑雙扶手設計：梯級加裝礦砂防滑貼，增設雙層防滑扶手，雨天都行得穩陣！
2. 智能節能照明：天台太陽能感光燈、樓梯感應燈 ，日夜自動調光，安全又環保 ！
3. 夜光樓層指示牌：大字體+高對比夜光牌，長者夜間辨認無難度！
計劃目標
- 減少跌倒意外
- 推動長者自主生活
- 打造跨代共融社區
上星期三（27/3），深水埗民政專員黃昕然主持竣工儀式，同街坊一齊體驗新設施，聽取長者住戶意見。依家樓宇設施改善咗，深DUCK鼓勵各位老友記多啲出門，約埋三五知己一齊飲茶，保持身心健康！
2.「樂齡無憂添關懷」浴室加裝工程
除咗樓宇設施嘅改善工程，長者嘅家居安全配套同樣重要。
深DUCK喺30/3去到麗閣社區會堂，同各位哥哥姐姐一齊參加「樂齡無憂添關懷」浴室加裝工程計劃啟動禮。
受惠嘅長者及義工分享，有唔少長者有自理能力，但因為缺乏浴室安全設施，怕會有跌倒嘅風險，甚至會減少沖涼次數，影響身心健康。
深水埗元州小區關愛隊為200名元州小區獨居、合住及有需要嘅家庭提供服務，安裝防滑摺椅及扶手，幫助行動不便嘅長者保持日常生活自理能力，降低家居意外風險。
深水埗民政專員黃昕然、立法會議員鄭泳舜、陳凱欣及深水埗關愛及社區發展基金副主席陳明耀都有出席典禮。各位長者又一齊進行簡單健體運動，締造關愛共融嘅社區 。
