@ 
饒館熊貓節喺上星期六(29/3)揭幕。深DUCK當然要去一探究竟，認識吓新加入深水埗區嘅熊貓朋友啦！
現場除咗有90隻大大小小採用環保物料製作嘅熊貓雕塑，亦有「藏･創市集」同埋「給自己的禮物」身心靈市集，希望提醒大家喺繁忙嘅日常生活之中，都要抽時間好好照顧自己嘅身心靈呀！
深DUC仲去咗聽常霖法師同杜興氏肌肉萎縮症患者陳梓鍵關於生命嘅對談，反思咗好多人生嘅重要課題，物質同心靈上都收穫滿滿！
活動由饒宗頤文化館、鄰舍輔導會及可道中學合辦。深水埗民政專員黃昕然、饒宗頤文化館總幹事李高凱盈、鄰舍輔導會總幹事馮绣文、嗇色園可道中學老師麥泳欣、微行動藝術家安泰都有出席開幕禮，欣賞共融藝術舞蹈，仲同一眾受邀團體嘉賓為獅子山模型進行揭幕儀式。
饒館熊貓節會展出到5月13日，快啲去饒館同佢哋打個招呼啦！
