@ 
九龍城區係香港多元族裔人士嘅主要聚居區域之一，而多元族裔人士中亦有不少穆斯林。根據伊斯蘭傳統，伊斯蘭曆第九個月為齋戒月。期間，穆斯林須齋戒，由日出到日落呢段時間完全禁食同禁水。穆斯林家庭就會準備豐盛晚宴，邀請親朋好友一齊喺日落後共晉「開齋晚餐」── Iftar。
日前（26/3）喺九龍城區議員利哲宏博士嘅邀請下，九龍城民政專員兼區議會主席蔣志豪、一眾九龍城區議員以及地區人士，聯同嚟自唔同國家嘅穆斯林共晉齋戒月期間獨有嘅「開齋晚餐」。
當晚高朋滿座，枱面擺滿生菜沙拉、椰棗、鷹嘴豆泥，以及各式穆斯林食品。活動主持人IRFAN KARABULUT 喺禱告後，向來賓介紹「開齋晚餐」嘅傳統，以及齋戒習俗嘅意義。踏入晚上6時45分日落後，大家開始一齊用餐。
唔講唔知，根據穆斯林嘅傳統，開齋晚餐嘅第一道餐點，竟然係甜甜嘅｢椰棗｣。原來，喺一天嘅禁食過後，分量唔多卻甜而有味嘅椰棗，可以幫助消化同提振精神。大家都入鄉隨俗，以椰棗為第一道餐點。唔少穆斯林嘅家人同朋友喺開齋晚餐時，都會按照傳統 ，以特定主題(如：愛、感恩、寬恕等)分享自己嘅體會，以加強家庭和社群聯繫。大家亦趁機與席上嚟自一帶一路沿線國家嘅精英學生交流分享，切身了解多元族裔青年嘅文化，以及佢哋對香港嘅想法。
當晚沒有你我之分，只有互相尊重同關愛。期待社區繼續以美食、笑容同開放包容嘅心，編織更緊密嘅跨文化交流網。專員亦鼓勵各位議員同在場嘉賓，日後可以喺區內舉辦更多嘅文化交流活動，促進交流認識、種族融和同社區團結。
@