@ 
深水埗4月6日有場好有意義嘅聾健共融活動，等深DUCK 為大家報道。
白田之友社同龍耳喺尋日包場，畀健聽同聽障人士一齊欣賞《看我今天怎麼說》。呢次放映會亦獲利希慎基金支持。
深水埗民政專員黃昕然喺放映前，用手語同大家打招呼同「講」開場白，都「講」咗3、4分鐘，好似有紋有路。佢仲提到，有理論認為人類語言源於手勢，換言之，手語其實係全人類嘅母語。
電影放映完畢後仲有大彩蛋，導演黃修平同男主角吳祉昊(Marco)驚喜現身，同大家互動並分享拍攝過程同感受。 戲內戲外嘅Marco都有戴人工耳蝸，佢分享自身經歷時，提醒無論各位選擇點樣溝通，都值得被尊重，最緊要搵到最啱自己嘅決定。
無論健聽同聽障觀眾都過咗個十分愉快嘅週日早上。活動由白田之友社同龍耳Silence合辦，利希慎基金贊助，深水埗民政處支持。
