@ 
風雨季將至，又係時候要為應對惡劣天氣做好準備喇！東區民政處4月8日聯同食物環境衞生署、港島東區地政處、土木工程拓展署、路政署、渠務署同漁農自然護理署，一齊去寶馬山雲景道附近嘅斜坡進行實地視察，睇吓點樣可以有效預防或減少山泥喺惡劣天氣下沖落山坡，盡量減低對附近市民同雲景道一帶交通造成嘅影響。
東區民政專員陳尚文一邊視察斜坡同附近環境，一邊同在場各部門同事討論同埋研究各種預防措施，包括加強檢查斜坡狀況、減低泥土沖蝕嘅預防工作、定期疏通斜坡渠道以防淤塞，同埋研究點樣有效阻止沙泥沖出馬路等，希望可以喺風雨季來臨前做好應對工作。
另外，東區民政處仲視察咗曾位於雲景道山坡上，已清拆嘅芽菜坑村舊址。由於嗰度荒廢已久，日久失修山徑嘅周圍佈滿雜物同瓦礫碎片，加上有野豬出沒，對附近居民同遊人構成安全隱患，不適宜前往。有見及此，東區民政處同相關部門除咗會勸喻市民注意山徑安全外，仲會研究防止市民前往芽菜坑村舊址嘅可行方法。
東區民政處一直非常重視強化東區應對極端天氣嘅能力，東區民政處會繼續積極協調各部門做好準備，減少惡劣或極端天氣對東區嘅威脅。
@ 
@