@ 
路政署署長邱國鼎4月11日專程去到東區，同東區民政專員兼東區區議會主席陳尚文，以及一眾東區區議員實地視察筲箕灣耀興道斜坡復修同道路復修工程，仲參觀咗路政署緊急控制中心。
署長先安排喺耀東邨耀明樓現場，同區議員講述2023年9月8日特大暴雨期間，耀興道一段道路因發生嚴重山泥傾瀉而全線封閉，路政署聯同其他部門進行嘅一連串嘅修復工作。最後階段復修工程亦已經完成，包括重開耀興道南面行人路、行人過路處、泊車錶位、殘疾人士專用泊車位及耀明樓對出巴士站。署長感謝東區區議員一直全力協助部門同居民溝通。
之後署長帶大家參觀路政署位於北角嘅緊急控制中心，由路政署同事講解喺惡劣天氣（如風暴或暴雨）期間，緊急控制中心嘅工作同喺有需要時處理道路突發事件，務求盡快恢復主要公共道路嘅路面交通。講解後，署長同區議員進行交流，令議員更深入了解路政署嘅工作。
相信今次交流有助東區區議員加深對路政署喺東區工作嘅認識。東區區議會會繼續同路政署緊密溝通同合作，努力為東區居民服務 。
