力爭上游@北區龍舟邀請賽

未食5月糭，北區已經率先扒龍舟喇！由北區體育會主辦，北區民政處同沙頭角區鄉事委員會協辦嘅北區龍舟邀請賽13/4喺沙頭角公眾碼頭熱血上演！

比賽吸引咗76隊健兒同一班熱情fans參加，現場歡呼聲此起彼落，振奮人心。各隊伍喺激烈嘅比賽中搏到盡，將團隊合作同競技精神發揮到極致。沙頭角公眾碼頭超過100米長，啱哂fans沿途吶喊助威！保安局局長鄧炳強、北區民政專員賴子堅同埋一眾嘉賓都嚟到現場為健兒打氣，仲頒發獎項畀優勝隊伍添！