@ 
今年係「全民國家安全教育日」10周年，離島民政處聯同離島區青年發展及公民教育委員會、新界社團聯會、新界青年聯會同香港升旗隊總會日前（12/4）舉辦「離島區全民國家安全教育日2025」，傳遞國家安全知識 ，營造社區共同維護國家安全嘅濃厚氛圍 。
正式活動前，離島民政處喺10/4安排咗一班學生到國家安全展覽廳參觀，為活動當日嘅國家安全問答比賽做好準備 。新界青年聯會副主席周元谷議員同新界社團聯會離島地區委員會副主席李友信亦有到場支持。展覽廳嘅内容豐富，涵蓋多個國家安全範疇，各位學生都認真聆聽導賞員講解 ，加強對國家安全嘅認知同理解。
活動當日內容豐富，首先由消防處大嶼山區指揮官李偉昌檢閱嘅制服團體大會操。會操中，制服團體特別採用中式步操，隊伍俐落整齊，神態威嚴 。當日亦有緊張刺激嘅國家安全問答比賽。今次比賽首次加入英文組，由超過180位唔同族裔嘅中小學生爭奪最終每組4個決賽名額，競爭激烈 。決賽分別由離島區青年發展及公民教育委員會主席陳狄安同新界青年聯會副主席周元谷主持。賽台上，學生除咗要熟讀國家安全知識 ，更要眼明手快，鬥快搶答問題得分，可謂緊張刺激，現場氣氛熱烈 ，台下觀眾掌聲如雷，歡呼聲不絕 ！最後由民政總署副署長王婉蓉，中聯辦新界工作部副部長李功勛，離島民政專員楊蕙心同一眾主禮嘉賓頒獎畀得獎學生同學校 ，為問答比賽畫上圓滿句號。
國家安全同我哋嘅生活息息相關，維護國家安全人人有責，一齊攜手並肩，讓國家安全走深走實。
@