@ 
4月15日係第10個全民國家安全教育日，灣仔區舉辦咗「全民國家安全教育日2025暨港島冰球國安盃」，同市民一齊學習國安知識。活動由香港島各界聯合會、香港灣仔區各界協會、香港東區各界協會、灣仔民政處、東區民政處、灣仔警區及東區警區聯合舉辦，場面熱鬧！
開幕典禮上，律政司副司長張國鈞 Horace Cheung、中聯辦港島工作部部長薛惠君、副部長尤斌、警務處處長周一鳴、民政總署署長杜潔麗、港島聯理事長蘇長荣、籌委會主席鄭承峰，以及一眾地區團體領袖齊齊現身支持，為活動揭開序幕。今年嘅活動內容豐富，除咗有國安資訊展板、以國安為題材嘅攤位遊戲外，仲邀請咗國家安全教育地區導師，同市民分享總體國家安全觀，帶領大家從社區層面認識香港國家安全嘅重要性。
警察裝備區亦成為活動嘅一大亮點，警隊搜查隊、護送組、高空工作區同東區警區嘅裝備展示吸引咗唔少市民參觀，仲有市民試坐警隊電單車同試玩高空搜查繩索，個個都威風凜凜，玩得不亦樂乎！
而今年最特別嘅環節莫過於「港島冰球國安盃」比賽。民政總署署長杜潔麗亦喺比賽前同參賽嘅小朋友打氣，佢哋都表示對比賽充滿信心！見到小朋友着上「全副武裝」，喺冰場上奮力拼搏，合力爭奪冠軍獎盃，瞬間帶動全場氣氛，觀眾們紛紛為佢哋加油打氣，場面熱血沸騰！
灣仔區會繼續凝聚社區力量，透過多元化活動加深市民對國家安全嘅認識！
