@ 
鞏固國民身份認同係深水埗民政處4大工作方向之一，而每年嘅國安教育日都係推進呢個目標嘅好時機。今年係第10國安教育日，推廣總體國家安全觀要走深走實。
尋日(18/4)係復活節假期第一日，深DUCK去到幸福邨同居民一齊參與由幸福小區關愛隊舉辦嘅全民國家安全教育日嘉年華。
場地擺設咗關於《基本法》、《香港國安法》等有關國家安全嘅展板，推廣國情知識教育，內容豐富，淺白易明。攤位遊戲既有趣又具教育意義，大家都玩得好投入，仲帶走多款精美國安紀念品。深水埗少年警訊亦準備咗維護國家安全遊戲攤位同居民互動，一齊歡度咗個輕鬆嘅下午。
關愛隊之前仲舉辦咗國家安全填色比賽，畀小朋友發揮小宇宙之餘，亦宣揚國家觀念重要性。當日就頒獎畀得獎者，同大家分享喜悅，冠軍仲係一位只有5歲嘅小朋友，犀利犀利！
希望透過唔同形式嘅活動，市民會對國家安全有更深嘅了解，並將呢份意識帶入日常生活中，共同守護國家同香港。
主禮嘉賓包括深水埗民政專員黃昕然、中聯辦九龍工作部處長歐陽瑋、深水埗警區助理警民關係主任李耀銘、深聯理事長陳偉明、區議員何坤洲、幸福關愛隊副隊長張德偉、幸福邨居民促進會榮譽會長譚釗怡、幸福邨居民服務促進會副主席陳培浩。
