@ 
灣仔區少年警訊一日連三日（4月16日至18日）帶大家連越古今，分別去到佛山、南沙以及東莞，參觀、參與以及參加各式各樣嘅展覽、活動以及體驗。一一為大家介紹下啦！
Day 1
灣仔區少年警訊一早就由深圳灣過關，第一站就去咗深圳大疆無人機體驗中心，由專業人員負責講解有關於唔同嘅無人機設計同埋功能，令到我哋嘅會員明白到無人機產業嘅發展歷程，有好多會員都好有興趣呀，小編都睇到好想買返部無人機返去玩啊！參觀嘅下半部分，灣仔區少年警訊仲有得玩「Robomaster對決比賽」，睇吓啲相大家玩得幾開心！下一站就去到位於西樵山下嘅黃飛鴻獅藝武術館，等我介紹吓啦！武術館係為咗紀念一代武術宗師黃飛鴻而建，裏面仲有寶芝林、百草堂、黃飛鴻史跡陳列館等等嘅建築。紀念館入邊仲有黃飛鴻武術館醒獅隊展示咗精彩嘅武術同埋舞獅表演，最後仲有得一齊試吓舞獅添，個個都玩到出晒汗，勁開心啊！第一日嘅行程去到咁多先，一齊返酒店休息同叉吓電先！
Day 2
第二日第一站會員去咗香雲紗非遺文化創意館，亦有專業人員介紹香雲紗幾百年嘅發展歷史，喺生産工作坊觀賞絲綢坯布成為香雲紗嘅流程，而且仲可以體驗香雲紗嘅製作，一齊試吓「抽絲剝繭」，真係一次好獨特嘅體驗啊，每個人都仲可以攞走自己嘅製成品返去分享俾自己嘅家人或者朋友睇吓，大家嘅手工都好好，好靚呀！隨即即刻出發去到最期待嘅地方-長隆野生動物園，估唔到可以咁近距離接觸咁多野生動物，仲記得喺小火車睇到嘅動物有，獅子、老虎、熊、駱駝、斑馬、長頸鹿、大象、羚羊……唔數啦，數唔晒呀，之後會員仲去咗百虎山、科莫多龍龍宮、熊貓樂園，真係睇到眼花撩亂，好彩大家都用手機記錄咗呢段咁美好嘅時光，等大家返到酒店嘅時候再慢慢回味啦！第二日嘅行程報告完畢！
Day 3
嚟到最後一日嘅行程，會員嚟到廣汽科技館，專業人員介紹咗多項有關汽車嘅前沿科技發展，由無人駕駛、記憶泊車到最新嘅儲電池系統，一應俱全，真係大開眼界。館內仲有展覽多架珍貴嘅汽車，大家睇到都忍唔住要上去試坐吓。嚟到行程嘅最後一站，就係最別具意義嘅-東莞虎門鴉片戰爭博物館，「林則徐虎門銷煙」，相信大家都對呢件歷史事件耳熟能詳，博物館詳細介紹咗鴉片戰爭嘅起因同埋經過，展示出銷煙池嘅木板，抗英時期用過嘅武器，當年繳獲英軍嘅楊昌楊炮等等珍貴嘅實物，亦有展覽用超大型嘅背景畫還原虎門要塞嘅雄偉場面，真係好感動，相信大家睇完呢個博物館會更加對呢段歷史有更深刻嘅體會，深受啟發。
