北區區議會流動會客室同大家見面

登登登櫈，北區區議會嘅流動會客室27/4初次登場，同大家見面！

流動會客室喺上水石湖墟嘅新康街行人專用區舉行，並由曾勁聰同劉鎮海兩位區議員當值。呢度係居民嘅周末聚腳地，所以我哋就喺呢度擺檔，等街坊可以同議員傾吓偈，分享對地區事務嘅睇法，又可以請區議員就地區個案幫手跟進，服務市民。當日都有唔少街坊嚟到會客室同議員見面，兩位議員亦都處理咗唔同嘅個案，涉及動物福利、青少年問題同婦女服務等議題，議員之後亦會繼續跟進！