@ 
為咗加強打擊大廈冷氣機滴水問題、改善社區環境衞生，食物環境衞生署中西區環境衞生辦事處4月25日喺石塘咀街市舉行「打擊冷氣機滴水行動」啟動典禮。中西區民政專員聯同中西區區議員、分區委員會委員及關愛隊成員都有去到現場大力支持，更協助向市民同商戶派發宣傳資料及紀念品。
啟動典禮有小型展覽，仲有清潔龍阿德同場演出，加強喺社區推廣打擊冷氣機滴水嘅訊息。
冷氣機滴水問題除咗對市民造成滋擾，更會影響遊客對香港嘅觀感。提提大家，因應夏季來臨，食物環境衞生署將會由五月開始喺全港各區選定嘅30個黑點進行打擊冷氣機滴水行動，並每周巡查黑點。中西區區議員及關愛隊亦會同部門攜手合作，一齊打擊大廈冷氣機滴水問題，並透過社區網絡作出呼籲，推動市民處理問題，改善社區環境。
