@ 
因應漁農自然護理署將會喺馬鞍山西沙路花園設立首個「都市農業」試驗項目，沙田民政專員兼沙田區議會主席余懷誠28/4聯同沙田區議會地區設施及工程委員會成員前往參觀漁護署同蔬菜統營處位於長沙灣蔬菜批發市場設立嘅「全環控水耕研發中心」。
漁護署代表介紹同示範水耕中心 嘅先進水耕技術同設備。大家了解到水耕中心採用既可善用空間，亦可節省人力資源嘅水耕新科技，對現代化農業有更深入嘅了解。
水耕中心持續積極進行研發工作， 包括挑選同測試新品種，以擴闊本地水耕蔬菜生產嘅種類 ，供市場有更多嘅選擇。中心職員亦會到訪不同嘅水耕農場作技術支援。
喺馬鞍山西沙路花園設立嘅首個「都市農業」試驗項目，預計今年投入運作，為將來喺新發展區推行都市農場嘅可行模式提供參照。都市農場可應用不同類型嘅現代化技術生產農作物，而馬鞍山項目會採用室內水耕生產蔬果於農場銷售，並提供農業相關嘅教育同休閒活動，相信都市農場會好受市民歡迎。
沙田區議會將繼續積極與漁護署及地區持份者溝通，共同推進以農業融入都市為概念嘅利民項目!
