@ 
「葵青戲棚傳統文化節2025」第二階段「天后聖母寶誕」慶祝活動已經喺4月28日開始咗喇 ！青衣「天后聖母寶誕」(農曆四月初三）因歷史原由，所以誕期有別於本港其他地區，亦係全港唯一將傳統天后賀誕文化結合地區特色市集嘅節慶活動 。除咗展示各種非物質文化遺產技藝，包括大型竹棚搭建嘅戲棚 、粵劇表演、神功戲 、大型花牌，亦喺戲棚外設置50多個特色攤檔，售賣手工藝品 、地道美食 同其他乾濕貨 。
天后寶誕嘅大型花炮，係華南祭祀習俗中最巧妙壯觀嘅工藝 。花炮上掛滿大量動物神獸 、燈籠 及神仙等造型嘅吉祥飾物，務求令每座花炮獨一無二 。最後喺兩側簪上金花配以長紅，寓意「風調雨順 、國泰民安 」。
30/4係天后正誕，各區「花炮會」代表喺場內表演舞龍 、麒麟及醒獅 助興，以鑼鼓 等中式音樂 護送花炮到場，場面熱鬧 。葵青民政專員鄧顯權、中聯辦新界工作部副處長吳家浩、葵青區議會提振地區經濟專責工作小組暨青衣鄉事委員會主席陳志榮、荃灣鄉事委員會主席邱錦平、馬灣鄉事委員會主席陳崇業同一眾政府部門代表蒞臨主禮，並按照傳統喺戲棚內舉行「花炮評選」 同「花炮抽籤」儀式 。
香港旅遊發展局都大力推介嘅「葵青戲棚」即將喺5月2日(星期五）結束，快啲約埋親友 嚟青衣體育會運動場，體驗傳統節慶文化同品嚐地道特色美食啦 ！大家仲可以透過參觀警務處 、環保署 同水務署 設置嘅專題攤位獲得相關資訊 及精美紀念品 。千祈唔好錯過「葵青戲棚」嘅沉浸式美食 及文化教育 之旅 。
適逢今年係《香港國安法》 頒布5周年，葵青民政處將於5月18日與青衣鄉事委員會籌辦「葵青區龍舟競渡2025暨《香港國安法》頒布五周年盃」 。約定你 ，一齊嚟青衣東北公園為運動健兒打氣 ，延續傳統文化節慶嘅歡樂氣氛 。
