@ 
東區年度盛事「東區慶賀譚公寶誕」開鑼喇！今年東區民政處聯同香港東區各界協會及筲箕灣社團聯合會繼續攜手合辦一系列精彩活動，同大家慶賀譚公寶誕。
4月29就舉行咗迎神儀式，為一連9日（29/4-7/5）嘅賀誕揭開序幕。東區民政專員兼區議會主席黎旨軒、中聯辦港島工作部副部長尤斌、香港東區各界協會會長溫俊文、筲箕灣社團聯合會主席許嘉雄以及一眾地區領袖，喺譚公廟迎接「譚公」參與盛事，場面熱鬧。
今年賀誕活動規模盛大，重點項目包括：
1.) 譚公福餅
東區獨創嘅「譚公福餅」一向廣受歡迎，今年除咗原味外，亦推出乙巳蛇年特別版「抹茶味」，並會喺活動中免費派畀市民，一同分享喜悅同祝福。
2.) 創新活動一：譚公誕導賞團（29/4-4/5）
筲箕灣有濃厚嘅歷史及廟宇文化！一連六日嘅導賞團，每日由不同嘅導賞員帶領大家穿梭大街小巷，深入介紹筲箕灣嘅特色，推動東區無處不旅遊！
3.) 創新活動二：紮作工作坊（29/4-1/5）
為咗推廣香港非物質文化遺產之一嘅紮作技藝，今年首辦紮作工作坊，教授紮作四大步驟「紮、撲、寫、裝」，畀參加者可以親自製作特色主題花燈。
4.) 粵劇晚會 (1/5-3/5)
粵劇團一連三晚呈獻不同嘅粵劇戲寶，包括《賀壽加官小送子》、《龍鳳爭掛帥》、《雷鳴金鼓戰笳聲》以及《花田八喜》。
5.) 國際盛事：獅王競賽2025 （4/5）
約40支來自中國內地、香港、澳門、馬來西亞、新加坡同日本嘅隊伍參賽，逐一施展渾身解數，爭奪獅王殊榮。
6.) 壓軸重頭戲：飄色地色巡遊 （5/5）
下星期一就係譚公誕正日，全港超過50隊巡遊隊伍，將會沿筲箕灣東大街，向市民同遊客送上祝福。為咗歡迎香港大熊貓新成員嘅加入，大會更特製巨型熊貓紥作及許願樹，並掛上由市民親手製成嘅花燈，凝聚幸福感。超過300米長嘅飛龍亦會喺巡遊壓軸登場，將熱鬧氣氛推至高峰！
7.) 飲食及消費優惠
有得玩，梗係有得食啦！東大街多個商戶喺譚公誕期間，提供多項飲食同消費優惠。
優惠及活動詳情可參閱大會海報。報咗名參加上述活動嘅你，記住準時出席啦！約定大家，東區繼續日夜都繽紛！
