@ 
由博愛醫院營運、位於打鼓嶺坪輋嘅過渡性房屋項目「博愛昇平村」工程接近完工，並預計喺暑假期間陸續入伙。博愛醫院喺7月初出席北區區議會大會簡介呢個項目，而北區民政專員賴子堅上星期聯同區議員同關愛隊去到昇平村，實地參觀村入面嘅出租單位同埋附近嘅環境同設施。
昇平村前身係60至90年代營運嘅昇平學校。改建工程喺2022年11月開工，係第一個村校改建嘅過渡性房屋項目。項目採用組裝合成法，所以喺短短一年半就可以完工，提供601個單位畀合資格家庭入住。單位特別設計成樓底高，地方實用又通爽，而且交樓標準已經包埋浴室、廁所、鋅盤，熱水爐️同冷氣機等設備，另外電掣、燈掣同寬頻掣，甚至電視機嘅上牆位都已經一應俱全！
昇平村將會係博愛醫院喺北區嘅第一個大型項目，希望博愛醫院喺北區打穩根基之後，喺區內提供更多服務，惠及居民！
